疫情開始後，你肥左幾多磅? 定係唔敢去磅？
疫情令到大家都好無動力，好想只係攤係個沙發度睇電話同埋睇電視。
但係大家都知道，保持身體健康，萬一covid入侵，都唔會搞到咁容易有其他并發症。
就算你好想出去運動，但係加拿大又成日都好凍，一係就成日落雨落雪。室内游泳池又唔開，健身室又唔開。
真係無動力啵，點算好呢？香港人，撐住啊！
今日同大家講下，到底點樣可以簡單Set Up 一個Home Gym，等你屋企人可以有動力的走下去。
如果你身體本身有舊患或長期病患的話，記得問下你家庭醫生這些儀器是否適合自己。
訓練肌肉同埋Keep Fit兩樣野絕對可以同時進行。而女士們可以放心，做肌肉訓練係唔會令到你變大隻架！（你就想啊，邊有咁容易變大隻）
而全身的肌肉訓練真係好緊要，可以助你減少日常生活，例如做家務、行上行落時的受傷機會。
1. 【帶氧運動】儀器
選好室内的帶氧運動儀器真係好緊要，因爲好多人買左，但係發現唔好玩就唔會用。
除了普通跑步機外，好多人會選擇室内單車 (indoor bike), 係選擇單車時，記得選擇有resistance（抵抗性）的，咁就可以長遠增加難度。
以往在香港生活時，我地都係用resistance bike，但搬左過黎加拿大後，發現有部儀器名叫Maxi Climber 原來都幾好玩。
佢等於係香港時登山的道理一樣，可以訓練全身肌肉，除左可以做HITT (高强度間歇訓練法)外，更可以局部訓練臀部、手部同埋大家近排大左好多既肚腩 （core）。
Maxi Climber – Amazon 賣緊約200蚊加幣
如果你本身有膝蓋或其他下半身病痛，又或者屬於【肥上半身、瘦下半身】的朋友仔，以上的機器都未必會適合你。因爲，這些儀器或者會加速你的下半身的勞損及增加受傷機會。
咁點算好？你可以選擇買返步天空漫步機 （elliptical machine），這機器同樣可以瘦全身。上網都好容易可以買到。
大家買完這些儀器後，唔係就咁hea 踩就算。要加强每天運動的效果，可以了解一下如何將HITT (高强度間歇訓練法)加入你的訓練中。當然，每個人可接受的强度不同，所以謹記要量力而爲，同埋跟住醫生指示啊。
2. 【非帶氧】肌肉訓練儀器
好多人都會忽略，非帶氧的肌肉訓練，除了可減低日常生活整傷的機會外，還可以消脂！無錯，唔洗喪跑都可以消脂！
當然，肌肉訓練係有好多學問。除了網上好多YouTuber所推介的body weight training (例如 Tabata Workout) 外，少量儀器也可以協助初學者去了解肌肉訓練的好處。
例如，resistance band 阻力带係所有健身界的好朋友，除了在熱身時大派用場外，還可協助輕度肌肉訓練，保持肌肉的靈敏度。
網上有好多有關resistance band的影片，大家可以參考下：
當然，如果你本身有健身經驗，懂得掌握其他儀器的話，啞鈴、健身球等都可以協助你保持身心健康。但如果唔識用的話就唔好亂黎，如果唔係整親自己就唔好啦！
最後提提大家，做以上運動都一定要著波鞋，千奇唔好偷懶！希望大家都可以保持健康的體魄和心態，齊齊合力打低個病毒！
如果反應好，將來分享更多比大家。
by Mr. Maple Couple – Certified Personal Trainer, American Council on Exercise
Comments