The Maple Couple 同學會潮文 #7【長文慎入】
多倫多一月入學同學仔【獌狗球迷】著
我諗我嘅故事要追溯起上尼，應該要由2014開始講起。2014年發生咩事唔詳細講啦，畢竟唔希望講完之後出唔到境… 大家心照。
當時我仲讀緊高中，準備緊考大學，一路睇新聞會知自己係咩立場但講真，某程度上受通識科影響 (因為要做剪報)，睇完新聞都係當交功課得個知字就算，冇話實際上做過啲乜野，亦都因為屋企人擔心所以冇做到啲乜野。難聽啲講句，當時嘅角色只係一隻剩係一心驚考唔到大學嘅港豬。
時間跳到DSE後，成績比預期差，呢個係我第一次萌生去外國讀書嘅念頭，去過啲教育展了解過，同屋企人都商量過獲得佢地首肯，當時其實都完全冇考慮過加拿大呢個選項。
然而，JUPAS放榜發現又一城大收左，就係咁，因為留番喺香港讀嘅經濟壓力冇咁大就留左喺香港，去外國嘅機會就咁擦身而過左。
時間再跳到去2019年，一個香港人刻骨銘心嘅年份。時移世易我亦都大學畢左業做左社會大學新鮮人，好好彩喺動蕩之中搵到份唔錯嘅大公司工作，更好彩係同事之間雖然冇講得好明白但都心知係同一陣線。
唔似以前放學要做功課溫書，工餘時間因為唔使處理公司野所以係有更多嘅時間mon po，睇新聞、直播等等。唔睇尤至可，越睇真係越心噏，更加深刻立體咁體會到件事已經去到臨界點，而當權者係冇任何要退讓或者醒覺嘅意思。然而，腦海中仍然都係冇走嘅想法。
事情慢慢發酵到各國開始公佈香港人救生艇計劃，眼見本地疫情好番好多但防控措施反而越加嚴格，覺得件事開始變質，佢地做嘅同我心中所想嘅越行越遠；同時疫情對自己行業嘅打擊係數一數二嚴重，短期內都冇乜復原嘅空間；各國又陸續開關，對於要走我比較放心唔落嗰位家人亦於年初離世，種種情況夾埋就開始萌生「不如走啦」嘅呢個念頭，開始做research比較各國pathway嘅優劣、邊度適合自己等等，因為真係唔想再被困喺呢個佔地千幾平方公里嘅大型監獄度。
英國BNO 5+1係最低門檻，號稱「呼吸plan」，好可惜小妹冇BNO而父母表示唔想一齊去陪坐所以作罷；有諗過去瑞士讀hotel management master，但見啲人讀完多數都係番番香港做野咁即係原地踏步，可以剔除；澳洲/ 紐西蘭似乎係個唔錯嘅選擇，天氣容易適應又相對地近少少，但做research當時所見嘅移民方法同正常冇乜分別，時間長而且計分難、歧視嚴重，亦都跨過唔到怕蜘蛛嘅心理關口，所以無奈都係放棄。
睇到呢度，我諗大家應該都估到，係，加拿大呢個雖然歧視冇咁嚴重但又遠又凍到飛起嘅地方其實真係唔係我first choice，係好後期先考慮嘅地點，甚至乎考慮加拿大嘅同時只係諗住apply owp過去而唔係諗讀書。
後尾上網見人話冇local experience比較難喺加拿大搵到工，就轉而選擇利用讀書做踏腳石。當時講緊係2021年3-4月嘅時間，有日上網睇睇下見到有個叫The Maple Couple嘅facebook page同網站，啲資料又幾詳細，又有拍youtube出哂樣唔似係呃人，雖則佢講到非誠勿擾好似好mean 咁，我就諗橫掂都係會讀，只係讀咩嘅分別，咪即管搵下佢睇下囉😂
事前知道一定唔係收我錢，如果問問下發現佢想收我錢咪即刻quit唔經佢搞囉。
填左張webform好快收到The Maple Couple聯絡，同佢傾左大概了解左我背景資料同想讀咩，佢有問我有冇興趣趕9月入學，但我唔想走得咁急，亦都想搵多幾個月錢就決定2022年1月先入學。
佢就即刻叫我send文件俾佢apply，話個course都算熱門，好快full。好啦咁啱我啲野其實都喺哂電腦要搵唔難，就好快send左俾佢。
然後一覺訓醒就已經收到學校嘅deposit letter叫我交留位費，實不相瞞當刻都嚇一嚇，冇諗過會process得咁快。
去到呢步，其實早到加拿大政府連stream A/ B都未公佈詳情，我都係搏一搏單車變摩托，得就上船唔得就行EE咁把心一橫去做。然後就一步一步等loa、搞學簽，經歷左坐立不安嘅兩個月，終於收到approve嘅消息，好記得當時番緊工爭啲大叫左出尼，相信唔使我講大家都會get到日等夜等等到菊花兒也謝了見到終於approve嘅心情係幾興奮😭
6月嘅時候join左其他9月同學仔嘅飯局 (係呀唔好意思我1月先入學但亂入左你地飯局XD)，佢地話其實學簽approve左之後先係開始，我當時的確唔係幾理解點解佢地會咁講，直至我學簽批左先醒覺原來係真有其事。
個學簽7月幾8月就批對於我1月開學尼講時間尚早，感覺仲係好似好多野準備又好似好多野要去到先做到咁。
首先係plan幾時飛、再plan幾時辭職、開始mon住個匯率換加紙等等。學簽批左冇耐我就已經買左機票，疫情關係因為驚個PCR test會因為航班disruption過期而唔係好敢轉機，一直想用miles 換機票，無奈大柴航空一直都冇位俾我換就唯有轉而幫襯楓葉航空買機票。
好，機票settle好下一步就係安排住，到埗之後住邊？租幾耐airbnb？夠唔夠時間搵屋？經同學會其他同學介紹搵左當地地產agent幫手，佢話我太早啦，飛前兩個月左右再搵佢啦。好，如是者去到飛前兩個月，10月，呢個時候，本身講好一齊夾租嘅同學因為私人理由決定唔夾。
唔緊要，再賣廣告招下其他housemate，收到好幾個回應，無奈都因為唔同嘅原因夾唔到。坦白講，眼見啲租盤僧多粥少，競爭大到一出就有10幾張offer一齊爭，租金越扯越貴，自己一個人住經濟上唔係幾afford到但又一直都未搵到housemate夾租，個心理壓力係前所未有咁大🤯
唔敢同屋企人講，朋友唔會明白我嘅處境亦幫唔到啲咩手所以都冇乜同佢地提起自己究竟有幾咁唔開心幾大壓力幾驚租唔到自己鍾意嘅地方。呢段期間喊左好幾次，但出奇地就算遇到咁多挫折，都完全冇動搖到我想過加拿大嘅念頭。
可能你會話，加拿大咁大，唔怕搵唔到樓啦。曾經我都抱住呢個樂觀嘅睇法諗住落左地再租樓，但一路同地產溝通發現情況遠比自己想像嚴重，因為實在太多香港人會同我同一時間飛過去，而且因為冇車牌，可以選擇嘅範圍係少左 (話雖如此，筆者而家係租左距離學校一個鐘車程而且中間要轉一程巴士嘅地方… )。
於是到最後都不得不租左先飛，而且仲要俾兩個禮拜吉租咁去租嗰間屋。可幸嘅係，最後都搵到其他3位housemates一齊夾租，而租屋過程都尚算順利。而家總算放下心頭大石叫暫時告一段落。
而家回想過去當初第一次同屋企人講話想走，其實我都已經唔係好記得佢地俾咩反應，應該都係話都咁大個人其實都阻止唔到我云云。
話冇唔捨得一定係假，但人各有志，人冇可能一世都生活喺屋企人護蔭之下，發現同家人嘅步伐開始唔一致就係自己出走展開新生活嘅好時機。
日子一日一日咁倒數，開始慢慢多farewell飯局先突然發現，原來距離自己真係要離開呢個生活左廿幾年嘅Home Kong嘅日子越尼越近，同朋友家人見面食飯嘅機會都係見一次少一次。有唔少朋友驚訝我呢個無論工作定個人興趣都同英國息息相關嘅人要走竟然唔係去英國，其實我自己都估唔到😂 估唔到自己咁怕凍都會揀加拿大，更估唔到自己係朋友圈入面第一個走嘅人。
不過人生係咁架啦，咁易俾你估到仲係人生咩🤗
上星期啱啱離開做左兩年嘅公司同同事一一道別，每個人嘅反應都係好鄧我開心搵到自己想行嘅路。
我又不禁喺度諗，其實呢條係咪真係我想行嘅路？
決定走其實會唔會係一個錯嘅選擇？
未來係點我唔知，我只係知道，我而家唔走他日就唔知會唔會再咁有guts的得起心肝走。希望他日回首過去，我唔會後悔當日冇鼓起勇氣行出呢一步。有人話我一個人走好勇敢，係，一個人咩都係自己plan自己落手落腳搞有時都幾手忙腳亂，但計我話，其實一家大細走嘅同學仔佢地係更勇敢，因為佢地要考慮、要犧牲同付出嘅一定遠比我更加多。
唔覺唔覺寫到呢度都差唔多3000字，其實寫呢篇文最主要目的唔係話想贏獎品 (有當然最好🤣🤣🤣) ，而係想借呢個機會俾自己deadline fight去整理下呢大半年尼發生左咩事同自己嘅心路歷程，就算冇咩參考價值，俾自己若干年後睇番回味下自己當年寫文懶係搧情係幾咁mk都好。
最後想講嘅係，多謝The Maple Couple同其他同學會同學嘅協助，好慶幸有咩唔識上group問都會一呼百應有人解答，如果冇你地support我應該已經倒瀉左籮蟹完全handle唔到。
當然都要多謝父母放手俾自己一搏，要接受自己個女一個人去咁遠闖蕩，個心理關口應該都唔易過。亦都多謝唔嫌棄我篇文又長又唚又1999睇到呢度嘅大家🙈
今次唔係去exchange更加唔係去旅行，一飛真係唔知幾時先會再番，畢竟唔想隔離，但更驚嘅其實係入左境會出唔番去。
其實我從來唔覺得外國嘅月亮係圓啲 (空氣可能係清新啲嘅)，飛左亦唔等於一天都光哂，唔等於忘本，但至少係可以有番多少少自由呼吸嘅空間，可以講自己想講嘅做自己想做嘅，飛左先更加有空間去做啲喺呢度已經冇可能再做到嘅野。
咁樣講完我唔知我會唔會出唔到境，但我想話，即使他日飛左，香港永遠都係我心目中無可取替嘅Home Kong。
“Asgard is not a place, it’s a people.”
各位香港人，共勉之。
可參賽人士：經The Maple Couple 免費報讀2021年5月、9月及2022年1月入學（任何合作學院），並最終成功入學的同學。請立即上載你的加拿大讀書的準備、經歷和故事。中英皆可，字數不限。
我們會稍後經專人選出當中最佳故事，作全民投票，頭3名勝出者將可獲得豐富獎品, 包括頭獎13吋Mac Book Air、二獎 New iPad、三獎 Bose SoundLink Bluetooth 360 Speaker
Comentários