《加拿大醫療制度 - 問題多多？解決方案何在？》
每次我們一家一病，就好掛住擁有私營醫療制度的地方。
係加拿大，所有嘢都講求耐性，有急病去醫院睇急症都係一樣。話說 Mr. Maple Baby 半夜三更（約12點）突然唔舒服，好似透唔到氣咁，咁我哋即刻送佢去急症。
加拿大無私家醫院，唯有去附近醫院搏鬥一番。
去到醫院，等咗15分鐘就有得見護士分流，護士話佢應該係上呼吸道感染。但係成個急症等候室都係人，等咗兩個鐘都未入到去病房。我們估計成個急症室可能得一個醫生…
阿仔已經等到由勁辛苦去到訓著咗。我地見佢穩定咗，就決定送佢返屋企先，第二日再去睇醫生。
第二日，我哋嘗試帶佢去睇兒科Walk In Clinic，去到果度護士話佢呼吸麻麻地，唔收症，要去急症室。
我地頓時O曬嘴，去急症？姐係又要再排過。
去到急症，等護士分流、醫生應診、照X 光、餵佢食藥，足足搞咗4個鐘 （其實已經算快，因為一般其他非緊急病人應該要等更耐）。
急診室走廊全部都係臥床和坐輪椅的病人。搞完成件事，唔好話細路，作為父母的都覺得好辛苦。
其實醫生、護士、醫護人員都好好人、好專業。大家一直謹守崗位，但大家都為人手短缺、醫療制度的長期問題而疲累。
免費醫療真係咁好？我唔知道；我只知道如果自己小朋友突然間病的時候，好多父母都會願意付出，等佢可以儘快得到適當的治療。
秋天到了，真係好容易病。希望大家都健健康康迎接紅葉的來臨。
www.themaplecouple.com
Comments